რა არის ჭადრაკი?

რა არის ჭადრაკი?

   ჭადრაკის სამყარო ჯადოსნურია. მასში მინიატურული სახით ასახულია ბრძოლით აღსავსე ჩვენი ცხოვრება. თვალნათლივ ჩანს ადამიანის გონების ძალა, ფანტაზია, ხასიათი, შრომისუნარიანობა, გემოვნება და მიდრეკილება. ამავე დროს ჭადრაკი გვასწავლის ლოგიკურ, თანამიმდევრულ აზროვნებას, სხვისი აზრის პატივისცემას. სვლის რიგითობა მოგვიწოდებს მოთმინებისა და ზრდილობისაკენ.

   დღევანდელ პირობებში, როდესაც მსოფლიოს მრავალ წერტილში დაძაბულობის კერებია, განხეთქილებაა ხალხებსა და სახელმწიფოებს შორის, საერთაშორისო ურთიერთობებში ნდობისა და კეთილმოსურნეობის დეფიციტია, ხალხების დაახლოების და ურთიერთგაგების ნებისმიერ, თუნდაც ლოკალურ, თუნდაც შეზღუდულ შესაძლებლობებს ხელი უნდა შევუწყოთ და სტიმული მივცეთ. სწორედ ჭადრაკი იმსახურებს ამ განსაკუთრებულ ყურადღებასა და ხელშეწყობას.

   ჭადრაკი ხელმისაწვდომია ყველა ასაკის ადამიანისთვის, მისი ეროვნების, რჯულის, მატერიალური მდგომარეობის, პოლიტიკური შეხედულებისა და ა.შ. მიუხედავად. ერთიანი საჭადრაკო სიმბოლიკა იძლევა წინაპირობას ამ სფეროში საერთაშორისო თანამშრომლობისათვის, გამოცდილების გაზიარებისათვის, ურთიერთდახმარებისათვის. ჭადრაკი თავისი არსით ნამდვილი მშვიდობის მტრედია. გავიხსენოთ მსოფლიო ჭადრაკის ფედერაციის, ფიდე-ს ლოზუნგი: „ჩვენ ყველა ერთი ოჯახი ვართ!”.

   1988 წელს, საბერძნეთში, ქალაქ სალონიკში ჩატარდა ფიდე-ს საერთაშორისო კონგრესი, სადაც მიღებულ იქნა შემდეგი მნიშვნელოვანი გადაწყვეტილება: „ვაღიარებთ რა ჭადრაკის აღმზრდელობით დიდ შესაძლებლობებს, რომელიც თავის თავში შეიცავს მეცნიერების ხელოვნებისა და სპორტის ელემენტებს, მის კეთილშობილურ გავლენას ადამიანის პიროვნების ჰარმონიულ განვითარებაზე, შეიქმნას ფიდე-ს საერთაშორისო კომისია „ჭადრაკი – ყველას”. გაეწიოს რეკომენდაცია ფიდე-ში შემავალი ყველა ქვეყნის ჭადრაკის ფედერაციებს, აწარმოონ აქტიური პროპაგანდა, საორგანიზაციო და მეთოდური მუშაობა ყველა ასაკის ადამიანების დასაინტერესებლად ჭადრაკით, განსაკუთრებული ყურადღება მიაქციონ ახალგაზრდების საჭადრაკო საყოველთაო სწავლებას”. რადგან ჭადრაკი ხელმისაწვდომია ყველა ასაკის ადამიანისათვის, ჩვენი უმორჩილესი თხოვნა და რჩევა იქნება, რა ასაკის ადამიანიც არ უნდა ბრძანდებოდეთ, თუ არ თამაშობთ ჭადრაკს, დაიწყეთ მისი შესწავლა, გაიმდიდრეთ და გაიმრავლაფეროვნეთ თქვენი ცხოვრება.

    ჭადრაკის შესწავლა შეგიძლიათ chadraki.ge-ზე. ეს არის პირველი ქართული საგანმანათლებლო საჭადრაკო ვებ-გვერდი, სადაც შეგიძლიათ შეისწავლოთ ჭადრაკი მიუხედავად თქვენი საჭადრაკო დონისა. ვებ-გვერდზე განთავსებულია უამრავი საჭადრაკო ვიდეო კურსი ქართულ ენაზე, სრულიად დამწყების დონიდან პროფესიონალების ჩათვლით.